Forskrift om opptak ved Fagskulen Vestland

FOR-2021-09-17-2913 · Kunnskapsdepartementet · I kraft 2022-01-01
⚖️ Fastsatt med hjemmel i: fagskoleloven

Forskrift om opptak ved Fagskulen Vestland

Kapittel 1. Generelle føresegner

§ 1-1. Heimel og verkeområde

(2) Forskrifta gjeld for personar som søker opptak til studieprogram ved Fagskulen Vestland. Formålet med forskrifta er å gi studentane utfyllande reglar og informasjon knytt til opptak ved fagskulen.

§ 1-2. Forholdet til anna lovverk

(1) For studentar ved Fagskulen Vestland gjeld fagskoleloven med tilhøyrande forskrifter.
(3) Lov og forskrift gitt av lovgivar skal ved motstrid gå framfor føresegner gitt i denne forskrifta.

§ 1-3. Ansvar for opptak

(1) Rektor er ansvarleg for opptak og skal på vegner av styret ved Fagskulen Vestland sørge for at opptaket til fagskuleutdanninga blir gjennomført korrekt.
(2) Rektor nemner opp medlemmer til ein opptakskomité som skal gjennomføre det praktiske opptaket og vurdere realkompetanse. Komiteen er sett saman av administrativt og pedagogisk tilsette.
(3) Det er rektor som fattar endeleg vedtak om opptak.

Kapittel 2. Opptakskrav

§ 2-1. Generelt om opptak

(1) Opptak av studentar til Fagskulen Vestland skjer gjennom Samordna opptak, jf. fagskoleforskriften § 3 (1). Ordinær søknadsfrist for fagskuleutdanninga er 15. april. Ved lokalt opptak til f.eks. enkeltemne blir søknadsfristen kunngjort på heimesida til Fagskulen Vestland.
(2) Opptak av kvalifiserte studentar skjer på grunnlag av rangering. Rangeringa skjer ved utrekning av poeng, jf. fagskoleforskriften § 14 (1).
(3) Grunnlaget for rangering er karakterane frå den dokumentasjonen som kvalifiserer søkjaren for ei fagskuleutdanning og annan dokumentasjon som gir tilleggspoeng, jf. fagskoleforskriften § 14 (2).
(4) Kvalifiserte søkjarar som ikkje kan poengbereknast, blir rangert på bakgrunn av ei realkompetansevurdering, jf. fagskoleforskriften § 17 (1).

§ 2-2. Opptakskrav

(1) Opptak til studia ved Fagskulen Vestland er anten relevant fag- eller sveinebrev, treårig yrkesfagleg opplæring eller generell studiekompetanse, jf. Nasjonalt kvalifikasjonsrammeverk for livslang læring nivå 4, eller tilsvarande realkompetanse, jf. fagskoleforskriften § 7 (1).
(2) Styret ved Fagskulen Vestland kan stille spesielle opptakskrav som er relevante for fagskuleutdanninga, jf. fagskoleforskriften § 7.
(3) Informasjon om spesielle opptakskrav, inkludert kva fagbrev eller vitnemål som gjev grunnlag for opptak ved Fagskulen Vestland, er nedfelt i studieplanane.
(4) Etter fagskoleforskriften § 7 (5) kan styret i tillegg stille krav om fullført og bestått fagskuleutdanning for opptak til fagskuleutdanningar. Anna fagskuleutdanning kan berre settast som opptakskrav i tilfelle der dei einskilde fagskuleutdanningane er sjølvstendige einingar som bygger på kvarandre, og det totale løpet for utdanningane som bygger på kvarandre ikkje overskrid to år. I særlege tilfelle kan det totale utdanningsløpet vere opptil tre år, jf. fagskoleforskriften § 42.

§ 2-3. Opptak på visse vilkår (vilkårsbunden opptak)

(1) Søkjarar som ikkje har fullført og bestått fag- eller sveineprøve innan fristen for å sende inn dokumentasjon, og som derfor ikkje er kvalifisert for opptak, kan likevel tildelast plass ved Fagskulen Vestland dersom dei kan dokumentere at dei skal gjennomføre fag- eller sveineprøven i løpet av første semester etter opptak, jf. fagskoleforskriften § 10 (1).
(2) Søkjarar som søkjer opptak på grunnlag av treårig yrkesfagleg opplæring eller generell studiekompetanse, og som ikkje kan gjennomføre eksamen i vidaregåande opplæring på grunn av spesielle tilhøve, kan likevel tildelast plass ved Fagskulen Vestland etter fagskoleforskriften § 11 (1) dersom følgjande vilkår er oppfylt:
  1. søkjaren består eksamen i eitt eller fleire fag i vidaregåande opplæring i løpet av første semester etter opptak
  2. søkjaren har standpunktkarakteren 2 eller betre i faget
  3. søkjaren har ikkje allereie avsluttande vurdering i faget, og
  4. søkjaren oppfyller fastsette karakterkrav når eksamen er avlagt.

Spesielle tilhøve er her sjukdom, ulykker eller dødsfall i nær familie. Fagskulen Vestland kan gi opptak på visse vilkår knytt til andre spesielle tilhøve enn dei som er nemnt her, jf. fagskoleforskriften § 11 (2).

(3) Etter fagskoleforskriften § 10 og § 11 gjeld følgjande for alle som har fått opptak på visse vilkår etter første og andre ledd:
  1. søkjaren kan ikkje reservere studieplassen til seinare opptak
  2. studenten misser studieplassen og studieretten dersom opptakskrava ikkje blir oppfylt innan fristen
  3. studentar som går opp til eksamen får ikkje denne eksamen godkjent som bestått utan at opptakskravet er oppfylt.
(4) Fagskulen Vestland skal så langt det er mogleg og rimeleg legge til rette for at studentar med opptak på visse vilkår kan gå opp til fag- eller sveineprøven eller utsett eksamen i vidaregåande opplæring, og samtidig gjennomføre utdanninga det er gitt vilkårsbunden opptak til. Dersom Fagskulen Vestland ikkje finn å kunne legge til rette på denne måten, skal studenten få forlenga opptaket på visse vilkår til neste gong det blir arrangert utsett eksamen i det aktuelle faget i vidaregåande opplæring, jf. fagskoleforskriften § 10 (5) og § 11 (6).
(5) Poengutrekning av søkjarar som søkjer opptak på visse vilkår er nærmare regulert i § 3-1 i denne forskrifta.

§ 2-4. Søkjarar med utanlandsk utdanning

(1) Søkjarar med fullført vidaregåande opplæring frå dei andre nordiske landa er kvalifiserte for opptak ved Fagskulen Vestland, utan tilleggskrav i norsk, når den vidaregåande opplæringa i dei respektive landa gjev generelt opptaksgrunnlag til tertiærutdanning tilsvarande norsk fagskuleutdanning, jf. fagskoleforskriften § 9 (1).
(2) Søkjarar utanfor Nordan kan søkje NOKUT om godkjenning av utanlandsk fag- og yrkesopplæring, jf. opplæringslova § 3-4 a. Alternativt må ein dokumentere opplæring og praksis ved autorisert translatør og ha bestått eller ha likeverdig realkompetanse i dei felles allmenne faga tilsvarande Vg1 og Vg2 i yrkesfaglege studieretningar. Søkjaren må i tillegg dokumentere kunnskapar i norsk på nivå med B2 i «test i norsk, høyere nivå («Bergenstesten»)» eller tilsvarande, jf. fagskoleforskriften § 9 (3).
(3) Det blir vist til fagskoleforskriften § 9 om utfyllande reglar om språkkrav for søkjarar med utanlandsk utdanning.

§ 2-5. Bruk av falske dokument ved opptak

(1) Bruk av falske vitnemål, andre falske dokument eller dokument frå falske institusjonar er ved opptak til Fagskulen Vestland forbode, jf. fagskoleloven § 16a første ledd. Søkjarar som handlar i strid med denne føresegna ved opptak til utdanning vil bli meldt til politiet, jf. fagskoleloven § 16a andre ledd.
(2) Ein søkjar som har søkt opptak til Fagskulen Vestland ved bruk av falske vitnemål, falske dokument eller dokument frå falske institusjonar, vil få dokumenta inndratt og får ikkje opptak til utdanning ved fagskulen i inntil eitt år, jf. fagskoleloven § 16a tredje ledd.
(3) Vedtak om inndraging og karantenetid etter denne føresegna blir treft av den lokale klagenemnda ved Fagskulen Vestland med to tredels fleirtal. Klage skal handsamast av Nasjonal klagenemnd for høyere yrkesfaglig utdanning, jf. fagskoleloven § 16a tredje ledd, jf. § 20. Klage blir handsama nærmare i kapittel 5 i studieforskrift for Fagskulen Vestland.

§ 2-6. Reservasjon av studieplass

(1) Søkjarar som har fått opptak ved Fagskulen Vestland, kan etter søknad få inntil to års utsetjing av studiestart ved sjukdom, svangerskap, barsel, verneplikt eller andre tungtvegande grunnar, jf. fagskoleforskriften § 13 (1). Innvilga søknad skjer under føresetnad av at det aktuelle studiet startar opp det året søkjar får permisjon til.
(2) Søknad med dokumentasjon skal sendast til Fagskulen Vestland innan tre veker frå tilbodet om studieplass blei motteke, jf. fagskoleforskriften § 13 (2).
(3) Søkjarar som har fått opptak på vilkår etter § 2-3 i denne forskrifta kan ikkje reservere studieplassen til seinare opptak, jf. § 2-3 (3) bokstav a.

Kapittel 3. Rangering ved opptak

§ 3-1. Poengutrekning ved rangering av søkjarar

(1)
OmtalePoeng
Det generelle grunnlaget for opptak etter § 2-2 (1)10 poeng
Relevant yrkespraksis i 100 % stilling utover det generelle grunnlaget for opptak, jf. gjeldande studieplan1 poeng per 6 mnd. (inntil 10 poeng)
Fagprøve med «greidd mykje godt»5 poeng
Relevant fagprøve i anna fag utover det generelle opptakskravet inkl. praksistid5 poeng
Relevant fagprøve i anna fag utover det generelle opptakskravet med «greidd mykje godt»2 poeng
Gjennomsnittleg karakterpoeng av talkarakterane i alle fagMultipliserast med 10
(2) Ved opptak på visse vilkår etter § 2-3 (1) i denne forskrifta blir søkjaren tildelt rangeringspoeng for å ha oppfylt det generelle grunnlaget for opptak, sjølv om fag- eller sveineprøven endå ikkje er fullført og bestått. Opptak ved ei slik førehandstildeling av rangeringspoeng inneber at eventuelle tilleggspoeng oppnådd etter søknadsfristen 15. april ikkje kan tilleggjast vekt.
(3) Ved opptak på visse vilkår etter § 2-3 (2) i denne forskrifta blir søkjaren poengberekna på bakgrunn av alle tilgjengelege karakterar som søkjaren har oppnådd på tidspunktet for opptak, sjølv om den vidaregåande opplæringa endå ikkje er fullført og bestått. Dette inneber at karakterar oppnådd etter søknadsfristen 15. april ikkje kan tilleggjast vekt.

§ 3-2. Rangering av søkjarar

(1) Søkjarar med høg poengsum skal rangerast framfor søkjarar med låg poengsum. Søkjarar med lik poengsum skal rangerast etter alder, der eldre søkjarar blir rangert først, jf. fagskoleforskriften § 14 (3).
(2) Dersom det er ledige studieplassar etter at det ordinære opptaket er gjennomført, kan Fagskulen Vestland tilby desse studieplassane til kvalifiserte søkjarar. Søknader om opptak til slike ledige studieplassar blir handsama i den rekkefølgja dei blir mottekne, utan omsyn til rangeringsreglane i første ledd, jf. fagskoleforskriften § 14 (4).
(3) Dersom det er venteliste etter at det ordinære opptaket er gjennomført, men fagskulen får ledige studieplassar etter studiestart, skal Fagskulen Vestland tilby dei ledige studieplassane til søkjarane på ventelista, jf. fagskoleforskriften § 14 (5).
(4) Ti dagar etter studiestart kan fagskulen tilby eventuelle resterande studieplassar til kvalifiserte søkjarar, utan omsyn til rangeringsreglane i første ledd, jf. fagskoleforskriften § 14 (5).

§ 3-3. Rangering av søkjarar som ikkje kan poengbereknast (realkompetansevurdering)

(2) Formålet med vurderinga er å avdekke om søkjaren har likeverdige ferdigheiter og kunnskapar jamført med søkjarar som får tilbod om opptak etter rangering på grunnlag av poengberekning, jf. fagskoleforskriften § 17 (1). Opptak gjort på bakgrunn av realkompetanse vil berre gjelde for den utdanninga søkjaren blir realkompetansevurdert til.
(3) Kompetansen til søkjaren blir vurdert opp mot læreplanmål i vidaregåande opplæring innan relevante programområde. Informasjon om kva som er relevant yrkesutdanning er nedfelt i studieplanane. Søkjaren må dokumentere kompetanse i felles allmenne fag som svarer til nivå 4 i Nasjonalt kvalifikasjonsrammeverk (NKR), jf. fagskoleforskriften § 7 (1).
(4) Søkjarar som søkjer studieplass ved Fagskulen Vestland på bakgrunn av realkompetanse kan vere:
  1. søkjarar som har fullført vidaregåande opplæring, men i eit anna utdanningsprogram enn det som er det formelle opptakskravet
  2. søkjarar som ikkje har fullført vidaregåande opplæring
  3. søkjarar med utanlandsk utdanning.
(5) Rektor er ansvarleg for å fatte vedtak om opptak på bakgrunn av realkompetanse etter innstilling frå opptakskomiteen, jf. § 1-3 i denne forskrifta.

Kapittel 4. Politiattest

§ 4-1. Krav til politiattest

(1) I utdanningar der studentar kan kome i kontakt med mindreårige som del av klinisk undervisning eller praksis, skal fagskulen krevje at studenten legg fram politiattest som omtalt i politiregisterloven § 39 første ledd. Fagskulen kan krevje at politiattest blir lagt fram både ved opptak og undervegs i utdanninga, jf. fagskoleloven § 27 første ledd.
(2) Fagskulen har plikt til å gjere kravet om politiattest kjent for studentar ved opptak til studium som er omfatta av desse krava, jf. fagskoleforskriften § 19.
(3) Søkjarar som er teke opp til studium der det blir kravd politiattest skal, saman med melding om at dei tek imot tilbod om studieplass, stadfeste at dei kjenner regelverket om politiattest, og at dei innan fristen vil levere denne, jf. fagskoleforskriften § 21. Søkjar må leggje fram politiattest til fagskulen innan fire veker etter at søkjaren har fått tilbod om studieplass, og attesten skal ikkje vere eldre enn tre månader på det tidspunktet den blir lagt fram for fagskulen, jf. fagskoleforskriften § 20.
(4) Ein student som ikkje legg fram politiattest i samsvar med reglane har normalt ikkje rett til å ta del i klinisk undervisning eller praksis ved fagskulen, og får ikkje utdelt vitnemål, jf. fagskoleloven § 27 tredje og fjerde ledd.

Kapittel 5. Klage

§ 5-1. Klage på vedtak om opptak

(2) Klage på enkeltvedtak om opptak basert på relevant fag- eller sveinebrev, treårig yrkesfagleg opplæring eller generell studiekompetanse skal handsamast av Nasjonal klagenemnd for høyere yrkesfaglig utdanning, jf. fagskoleforskriften § 43 bokstav a.
(3) Klage på enkeltvedtak om opptak basert på realkompetanse eller spesielle opptakskrav skal handsamast av den lokale klagenemnda ved Fagskulen Vestland, jf. fagskoleforskriften § 43 bokstav a.

Kapittel 6. Ikraftsetjing og oppheving

Tekst: Lovdata (offentleg eigedom, jf. åndsverkloven § 14), gjengitt uendret per siste tilgjengelige versjon. Rettsregels lovkommentarer er tydelig merket og er våre egne.