Forskrift om dvergålegras (Zostera noltei) som prioritert art

§ 1. Dvergålegras som prioritert art

Dvergålegras (Zostera noltei) er utpeika som prioritert art.

§ 2. Føremål

Føremålet med forskrifta er å ta vare på dvergålegras i samsvar med forvaltingsmålet for artar i naturmangfaldlova § 5 første ledd.

§ 3. Forbod mot uttak, skade og øydelegging

Alle former for uttak, skade eller øydelegging av dvergålegras er forbode. Som øydelegging er medrekna mudring, utbygging, utfylling og endring av straumforholda og andre handlingar dersom dei er eigna til å skade eller på annan måte forringe førekomstar av arten.

§ 4. Skjøtsel

Forvaltingsstyresmakta, eller den forvaltingsstyresmakta har inngått avtale med, helst grunneigar, kan setje i verk tiltak i samsvar med naturmangfaldlova § 47, jf. § 24 andre ledd, for å oppretthalde eller oppnå den natur- eller kulturtilstanden som er nødvendig for å sikre bevaring av arten.

§ 5. Forvaltingsstyresmakt

Statsforvaltaren er forvaltingsstyresmakt etter forskrifta.

Endra ved forskrift 8 okt 2021 nr. 2958 (i kraft 1 nov 2021).

§ 6. Dispensasjon

Statsforvaltaren kan, etter søknad, gjere unntak frå forboda i § 3 i samsvar med naturmangfaldlova § 24 femte ledd. Gjeld søknaden fleire fylke, blir han handsama av Miljødirektoratet.

Ved søknad om dispensasjon frå forskrifta, kan forvaltingsstyresmakta krevje at følgjene av det planlagde tiltaket for arten blir klarlagde i samsvar med naturmangfaldlova § 24 første ledd bokstav c.

Endra ved forskrift 8 okt 2021 nr. 2958 (i kraft 1 nov 2021).

§ 7. Ikraftsetjing

Forskrifta trer i kraft straks.

Tekst: Lovdata (offentleg eigedom, jf. åndsverkloven § 14), gjengitt uendret per siste tilgjengelige versjon. Rettsregels lovkommentarer er tydelig merket og er våre egne.